Gleðilegan hversdagsleika!

Lukkan mín horfir heilluð í rauðan logann.

 

Þá eru jólin búin, við fölskyldan sprengdum þau í burtu fyrr í kvöld ásamt greinilega nokkrum öðrum íbúum stór Kópavogssvæðisins sem áttu afganga frá Gamlárskvöldi. Spennandi ár er framundan, Erla að klára sjúkraþjálfunina í vor, stórar hjólaferðir hérlendis og erlendis á dagskránni, árskort á skíði bíður í veskinu eftir kaldari tíð, stór og spennandi verkefni bíða í vinnunni, langt og gott ferðasumar í sjónmáli og margt annað spennandi og skemmtilegt. Óopinber og óformleg áramótaheit hafa verið strengd inni í sálinni og allt klárt fyrir gott ár framundan.

Gleðileg Jól!

Jólaundurbúningi okkar litlu fjölskyldu er því sem næst lokið. Það er þorláksmessa og allt orðið nokkuð snyrtilegt innandyra og Lukka bíður í ofvæni eftir jólunum. Hún er svo spennt að hún veit stundum ekkert hvað hún á af sér að gera. Settum jólatréð saman í gær og settum seríuna á það. Lukka og ég skreyttum það svo í morgun. Fórum í húsdýragarðinn í gær með Atla og Jóhönnu og áttum hann eiginlega út af fyrir okkur. Greinilega ekki margir sem máttu vera að því að fara þangað í jólatraffíkinni. Hittum Gáttaþef hjá selatjörninni og hann spjallaði heilmikið við okkur enda ekki margir aðrir á ferli til að tala við. Við óskum öllum gleðilegra jóla!

Tveir jólasveinar, Atli og Gáttaþefur (Atli er þessi með bakpokann), ásamt Erlu, Lukku og Ívar Inga.

Smá ves…

Ég var víst búinn að lofa fleiri myndum úr sumarfríinu á flickrið en ég lenti í smá veseni með að importa þær af flakkaranum. Ég er orðinn uppiskroppa með pláss á harða disknum og keypti því annan í Tölvulistanum. Hvað sem ég gerði þá fékk ég alltaf bláskjá í vinnslu á nýja disknum. Tók hann því úr aftur og þarf að skila honum. Hef bara ekki komist í það vegna anna þannig að nýjar myndir koma þegar ég hef unnið úr þessu smámáli. Hef í staðinn aðeins verið að vinna í “eldri” myndum sem teknar voru fyrr í sumar.

 
Þessi var tekin í Grjótagjá á Mývatni í byrjun júlí.